| |
Noyabrın 29-30-da ölkə ərazisində müşahidə olunan anomal temperaturların düşəcəyi, dağlarda isə sulu qar yağacağı ehtimal olunsa da, həftəsonunu noyabrda az təsadüf olunan günəşli hava ilə yola saldıq.
Azərbaycan Ekologiya və Təbii Sərvətlər Nazirliyinin Milli Hidrometeorologiya Departamentinin Hidrometeoroloji Proqnozlar Bürosunun baş hidroloqu Asif Verdiyevin verdiyi məlumata görə, belə anomal hava şəraiti, əsasən noyabrın 23-24-də müşahidə olunub: “Temperaturlar Aran rayonlarında 15-17 dərəcə, dağlıq rayonlarda 8-10 dərəcə, Bakıda və Abşeron yarımadasında isə 14-17 dərəcə isti təşkil edib. Bu da iqlim normasından 6,5 dərəcə yüksəkdir. Belə temperaturlar son 112 ildə rekord göstərici hesab olunub. Son 15 il ərzində isə noyabrın üçüncü ongünlüyündə temperatur bu ilin müvafiq dövrünə nisbətən xeyli aşağı olub və iqlim norması daxilində tərəddüd edib”.
Ötən həftəsonu proqnozlaşdırılan yağış və sulu qara gəlincə, baş hidroloq deyib ki, Lənkəran-Astara zonasında yağış yağıb, Böyük və Kiçik Qafqaz dağları isə artıq qarla örtülüb.
A.Verdiyevin sözlərinə görə, dekabrın 2-3-də Bakıda və Abşeron yarımadasında dəyişkənbuludlu, əsasən yağmursuz hava şəraiti üstünlük təşkil edəcək: “Şimal küləyi əsəcək, havanın temperaturunun gecə 8-10 dərəcə, gündüz isə 14-16 dərəcə təşkil edəcəyi gözlənilir. Dekabrın 4-də də dəyişkənbuludlu, əsasən yağmursuz hava şəraiti gözlənilir. Gecə və səhər bəzi yerlərdə zəif duman olacaq, şimal-şərq küləyi əsəcək, havanın temperaturu gecə 7-9 dərəcə, gündüz 12-15 dərəcə isti təşkil edəcək. Azərbaycanın rayonlarında dekabrın 2-də, əsasən yağmursuz, gecə və səhər bəzi yerlərdə duman, Lənkəran-Astara zonasında yağış yağacağı gözlənilir”.
|
Geri
Eyni kateqoriyadan digər xəbərlər
