| |
 Geri |
|
| |
 |
İsrailin hiyləgər oyunu
03.12.2008 10:39:49
İsrail kəşfiyyatı Tehranın nüvə proqramlarını əngəlləyib
|
|
| |
İsrail xüsusi xidmət orqanları İranın nüvə fəaliyyətlərini əngəlləmək üçün ağlasığmaz və hiyləgər plan həyata keçirib. Bu ölkədə nəşr edilən nüfuzlu “Haaretz” qəzetinin yazdığına görə, “Mossad”ın uzun müddətdir İranın nüvə texnologiyalarına çıxışını əngəlləmək üçün həyata keçirdiyi bu planın üstü yaxınlarda açılıb.
Məlum olub ki, İsrail kəşfiyyatı əvvəlcə bilərəkdən İrana bir sıra xarici şirkətlərin əli ilə nüvə materialları və texnologiyaları ötürüb. Tehranın etibarını qazandıqdan sonra saxta şirkətlər dövriyyəyə girib və İrana saxta nüvə materialları satılıb. Nəticədə İranın nüvə silahı əldə etmək proqramı ciddi şəkildə pozulub. İran “Mossad”ın oyunundan yalnız ölkənin dövlət qurumları üçün xaricdən elektron avadanlıqlar ixrac edib satan biznesmen Əli Əştarinin İsrail xüsusi xidmət orqanlarının agenti olduğunu biləndən sonra xəbərdar olub. Qəzetin yazdığına görə, “Mossad” İranın nüvə proqramlarını əngəlləmək üçün bir sıra ölkələrdən, o cümlədən Azərbaycandan istifadə edib.
“Haaretz” yazır ki, “Mossad”ın indiki direktoru Meir Dagan öz fəaliyyətini İranın nüvə silahı proqramını əngəlləməyə yönəldib. Bu məqsədlə “Mossad”ın bütün agentura şəbəkəsini və resurslarını səfərbər edib. Daganın rəhbərliyi ilə hazırlanan plan əsasında əvvəlcə bir sıra Yaxın Şərq və Avropa ölkələrindən şirkətlər İrana nüvə texnologiyaları və materialları təklif ediblər. Lakin bu materiallar nüvə tsiklini tamamlamağa və atom silahı əldə etməyə imkan verəcək dərəcədə önəmli olmayıb. Bildirilir ki, söhbət daha çox nüvə sahəsinə aid yardımçı materiallardan gedir. İran bu materialları yaxşı pul ödəyərək əldə edib. Tehranın etibarını qazandıqdan sonra “Mossad”ın qurduğu saxta şirkətlər işə düşüb və onlar əvvəlki əməkdaşlığın davamı olaraq İrana nüvə materialları təklif ediblər.
İran kifayət qədər böyük məbləğlər hesabına bu materialları əldə edib. Lakin sonradan məlum olub ki, onlar heç bir işə yaramır. Xəbərdə deyilir ki, “Mossad”ın həyata keçirdiyi fəaliyyətlər nəticəsində İspaniya, Belçika, Avstriya, Tanzaniya, Azərbaycan və digər ölkələr İranın nüvə fəaliyyətlərinin əngəllənməsində iştirak ediblər.
Qəzetin yazdığına görə, Pakistanın nüvə alimi Əbdülqadir Xana bağlı nüvə qaçaqmalçılığı şəbəkəsində adı keçən isveçrəli iş adamlarının da əslində Amerikanın Mərkəzi Kəşfiyyat İdarəsinə işlədikləri üzə çıxıb. Həmin iş adamları İrana nüvə materialları satıblar. Lakin belə görünür ki, bu materiallar da qüsurlu olub və bilərəkdən İrana ötürülüb. Məlumatda deyilir ki, “Mossad”ın İrana ötürdüyü avadanlıqların və materialların üzərində dinləmə cihazları da yerləşdirilib. Qəzet yazır ki, İranın İnqilab Keşikçiləri Korpusuna içərisində “juçok”lar quraşdırılan elektron rabitə cihazları satan iş adamı Əli Əştarinin də həbsi bununla bağlıdır. Əştari bugünlərdə “Mossad” agenti olduğuna görə İranda edam edilib.
Bildirilir ki, İranda son günlər “Mossad” şəbəkəsinin yaxalandığı haqda xəbərlər İsrailin və Qərbin xüsusi xidmət orqanlarının Tehranın nüvə fəaliyyətlərini əngəlləmək üçün göstərdikləri fəaliyyətlə müqayisədə aysberqin yalnız görünən hissəsi ola bilər. İran etiraf edib ki, Əştarinin daxil olduğu “Mossad” şəbəkəsi ölkənin nüvə proqramlarını ciddi şəkildə əngəlləyə bilib, bu şəbəkə hətta xüsusi xidmət orqanlarına da sızıb və çoxsaylı məxfi məlumatları xaricə ötürüb.
|
| |
|
| |
|
|
|
| İrad tutulmamışdır. İlk iradçı olmaq üçün tıklayın!
|
|
|
|
|
|
| |
| |
|
|
|
|
|
|
|
|
| |
 SORĞU |
|
|
|
|
|
|
|
|
Eyni kateqoriyadan digər xəbərlər
