| |
Dünən gecə Səhiyyə Nazirliyinin Maştağada yerləşən 1 saylı Psixiatriya Xəstəxanasında insident baş verib.
Xəstəxananın baş həkimi Ağahəsən Rəsulov bildirib ki, insidentə xəstələr arasında düşən münaqişə səbəb olub. A. Rəsulovun sözlərinə görə, daim söyüş söyən xəstələrdən biri bu hərəkətini yenə də təkrar edəndə iki xəstə onunla əlbəyaxa olub. Xəstələri sakitləşdirmək üçün hadisə yerinə Sabunçu Rayon Polis Şöbəsinin əməkdaşları çağırılıb.
Səhiyyə Nazirliyinin mətbuat xidmətindən bildirilib ki, hazırda vəziyyət stabildir və baş vermiş hadisə ilə bağlı tədqiqat aparılır.
İşgəncələrə Qarşı Azərbaycan Komitəsinin rəhbəri Elçin Behbudov isə APA-ya bildirib ki, Maştağa qəsəbəsində yerləşən 1 saylı Respublika Psixiatriya Xəstəxanasının nəzdində yerləşən Məcburi Psixiatriya Müalicə Şöbəsində saxlanılan şəxslər siqaret və telefon tələb edərək qiyam qaldırıblar: “Müalicə müəssisəsinin rəhbərliyinin mənə verdiyi məlumata görə, xəstələr artıq sakitləşdirilib. Deyilənə görə, bu, polisin səyi nəticəsində mümkün olub. Mənə onu da bildirdilər ki, sakitləşdirmə zamanı döyülmə hallarına yol verilməyib”.
Komitə sədrinin sözlərinə görə, adıçəkilən şöbədə cinayət törədib, məhkəmədə cinayət törədən zaman ruhi xəstə, anlaqsız olduğu sübut edilən şəxslər müalicə olunurlar. Burada müalicə prosesi məcburi qaydada aparılır və müəssisə qapalı tiplidir”.
E. Behbudov həmin müəssisədə təxminən 100 ruhi xəstənin müalicə olunduğunu açıqlayıb. |
Geri
Eyni kateqoriyadan digər xəbərlər
