| |
Qalmaqala səbəb Elnurun mahnı müsabiqələrinin birində ifa etdiyi «Gecələr» mahnısının Bəhram Nəsibova aid olduğunu deməsi olub
Xalq artisti Niyaməddin Musayev bir qədər əvvəl açıqlamasında müğənni Elnuru yalançılıqda ittiham etmişdi. Səbəb isə Elnurun mahnı müsabiqələrinin birində ifa etdiyi «Gecələr» mahnısının Bəhram Nəsibova aid olduğunu deməsi olmuşdu. Bu haldan qəzəblənən Niyaməddin Musayev “Mən 78-ci ildə estrada mahnıları yazıb böyük konsertlər verəndə, Elnur heç anadan olmamışdı. İndi kimsə mahnı yazır və onu remiks edib xalqa sırıyırlar. Mənimsə yazdığım mahnıları özəlləşdirməklə məşğuldurlar. “Daşlı qala” mahnım bütün türk dünyasında populyardır. Amma Niyaməddin Musayevin adını çəkən də yoxdur. Bu, ömrünü Azərbaycan mədəniyyətinə sərf edən bir insan kimi mənə pis təsir edir. Şəxsən mən Elnura qulaq asmıram! Mahnımı oxuyursa, heç olmasa, müəllifin adını düz desin. Hələ mən icazə almasından danışmıram. Hamı ilə söz güləşdirəcək yaşım da deyil. Səviyyəmi qoruyuram!» - deyə açıqlama vermişdi.
Xəbərdən sonra Bəhram Nəsibovun qızı “Sarı” jurnalının redaksiyasına zəng vurub, əlindəki faktlarla mahnının əsl müəllifinin kim olduğunu sübuta yetirəcəyini söyləyib: «Niyaməddin Musayevin bu hərəkəti birinci dəfə deyil ki, baş verir. Uzun illər bundan əvvəl o, «Şahnaz» təsnifini də öz adına çıxarmışdı. Elə həmin mahnının hesabına da səhnəyə gəlib məşhurlaşıb. Biz etiraz səsimizi qaldırandan sonra, o bu mahnıdan əlini çəkdi. Sonra atamın başqa mahnılarına iddiasını irəli sürdü. Bu, nə qədər davam edə bilər?! Qətiyyətlə deyirəm ki, «Gecələr» Bəhram Nəsibovun mahnısıdır! Bu mahnı iki il bundan əvvəl Müəllif Hüquqları Agentliyindən də qeydiyyatdan keçib. Görürük ki, onun iddiaları artıq genişlənir, biz susduqca onun hörmətsizliyinin şahidi oluruq, başladıq mahnıları rəsmiləşdirməyə. Atamın mahnısı artıq qeydiyyatdan keçib və Bəstəkarlar İttifaqı da buna rəy bildirib. Bizdə audiokaset var, atam bu mahnını tarla çalıb, oxuyub, mahnı qurtarandan sonra da öz səsi ilə tarixini də qeyd edib: «On iki dekabr, min doqquz yüz yetmiş dördüncü il (1974.12.12). Hətta bir neçə il bundan əvvəl Niyaməddin Musayev iddia etmişdi ki, «Daşlı qala» mənim mahnımdır, amma sübut olundu ki, mahnının müəllifi heç də o deyil. İslam Rzayev bu mahnını yazanda Niyaməddin Musayev hələ heç musiqiyə gəlməmişdi! Sonra da «Axtarma məni» mahnısına qol qoydu. Halbuki bu, əfqan mahnısıdır».
Niyaməddin Musayev “Sarı” jurnalına müsahisəbində bu mövzu ilə bağlı faktsız-sübutsuz iddialar irəli sürüb: «Mən rəhmətlik Bəhramın «Şahnaz» təsnifini oxumuşam. Bəhram özü mənə bu mahnını verib, amma nəqarat yerini özüm dəyişmişəm. O ki qaldı «Gecələr»in mənə aid olduğunu deməyim, bu, uydurmadır. Yalan deyirlər». Xalq artisti deyilənləri təkzib etsə də, digər tərəfdən, qanunla Bəhram Nəsibova aid olan mahnının başqasına aid olduğunu iddia edib: «Bəhramın o qədər yaxşı mahnısı var ki! Amma «Gecələr» mahnısı onunki deyil! Uzun illər bundan əvvəl Mingəçevirdə olanda bir qarmonçalan mənə yaxınlaşıb bu mahnını təklif edib», deyə N. Musayev qeyd edib.
|
Geri
Eyni kateqoriyadan digər xəbərlər
