| |
"Orta məktəblərdə tədris olunan hərbi dərsliklər bərbad vəziyyətdədir"
Orta məktəblərdə tədris olunan hərbi dərsliklər bərbad vəziyyətdədir. Suraxanı və Xətai rayonunun bir neçə orta məktəbinin hərbi hazırlıq müəllimləri bununla bağlı prezidentə müraciət ediblər. 17 müəllimin imza atdığı sənəddə müharibə şəraitində olan bir ölkənin məktəblərində hərbi hazırlığın aşağı səviyyədə olduğu vurğulanır və prezidentdən dərsliklərin dəyişdirilməsi ilə bağlı müvafiq göstəriş verməsi xahiş edilir. Bu barədə Suraxanı rayon 270 saylı orta məktəbin müəllimi Rasim Bağışov məlumat verib. O bildirib ki, həm də yeni dərslik yazmağa iddialıdır. R.Bağışovun sözlərinə görə, 10-11-ci siniflər üçün nəzərdə tutulan gənclərin çağırışaqədərki hazırlığı fənninin dəsliklərindən bütün hərbi texnika, döyüş sursatları çıxarılıb.
Kitabın müəllifi olan Həbib Ocaqov uzun illər sualtı qayıqda işləyib. Hərbi ekspertlərin fikrincə, kitabda daha çox quru qoşunlarından və ümumi hərbi hazırlıqdan bəhs edildiyindən, dərsliklər üzərində dənizçi, tankçı, raketçi yox, konkret olaraq piyada qoşunlarında xidmət etmiş yüksək rütbəli şəxslər işləməlidir. Digər qoşun növlərində xidmət etmiş mütəxəssislər isə ona yardımçı olmalıdır. Bu kitabın tərtibatında isə dənizçinin, özü də sualtı qayıqda xidmət etmiş şəxsin birbaşa işləməsi dərsliyin tam və peşəkar nöqteyi nəzərdən hazırlanmasında problem yaradır. Ona görə ki, dənizçi quru qoşunlarının spesifikasını tam bilmir. Rasim Bağışov bildirib ki, bu səbəbdən də Həbib Ocaqovun müəllifi olduğu kitabda bir sıra problemlər var: «Adi elementar patronu götürək. Bir patronun hazırlanmasına 15 il lazım gəlir. Bunlar patronun yerinə gilizi göstərirlər».
Rasim Bağışovun sözlərinə görə, texniki göstərici silahın canı olsa da, dərsliklərdə bu da nəzərə alınmayıb. Məsələn, rus artilleriyasının Allahı Şıxlinski hesab edilir. Amma həmyerlimizin dünyada məhşur düsturu bu kitablarda özünə yer tapmayıb: «Yaxşı snayper hazırlamaq üçün o bu düsturları bilməlidir. Müasir Milli Orduya savadsız uşaq göndərməzlər».
Rasim Bağışov bildirib ki, dərsliklərdə standarta uyğun olmayan mövzular həddindən artıqdır: «Məsələn, bir mövzu 21 səhifədən ibarətdir ki, şagird hətta vunderkind olsa da belə, bunun öhdəsindən gələ bilməz. Və yaxud, dərslikdə məsələn, Fövləqadə Hallar Nazirilyinin bütün şöbələri sadalanır ki, buna qətiyyən ehtiyac yoxdur və bu, hərbi komisarlığa aid məsələlərdir. Şagirdə isə konkret elm lazımdır. Ruslarda kitab piyadanın döyüş maşını ilə başlayıır. Bizdə isə bunlar çıxarılıb».
Təhsil Nazirliyinin dərslik və nəşriyyat şöbəsinni müdiri Faiq Şahbazlı məsələ ilə bağlı bildirib ki, sözügedən dərsliklərə həm Müdafiə, həm də Fövqəladə Hallar Nazirlikləri, həm də Azərbaycan Pedoqoji Universitetinin müvafiq kafedrası rəy verib.
|
Geri
Eyni kateqoriyadan digər xəbərlər
