| |
 Geri |
|
| |
 |
Gürcüstanla Rusiya arasındakı gərginlik silahlı qarşıdurma mərhələsinə kecə bilər
30.04.2008 11:13:12
Rusiyanın tanınmamış Osetiya və Abxaziyada olan vətəndaşlarını qoruyacağına dair bəyanatına cavab olaraq Gürcüstan istənilən təcavüzkar hərəkətin cavabsız qalmayacağını bildirib |
|
| |
Rusiya ilə Gürcüstan arasındakı gərgin münasibətlər növbəti- silahlı qarşıdurma mərhələsinə kecə bilər. Belə ki, rəsmi Moskvanın tanınmamış Osetiya və Abxaziya respublikasında olan vətəndaşlarını qoruyacağına dair bəyanatına cavab olaraq Gürcüstan tərəfi istənilən təcavüzkar hərəkətin cavabsız qalmayacağına vəd verib.
Rusiyanın Müdafiə Nazirliyi Gürcüstanı Rusiya sülhməramlılarına qarşı təxribatda ittiham edib. Müdafiə Nazirliyinin bu gün yaydığı bəyanatda bildirilir ki, Rusiya sülhməramlıları tanımamış Abxaziya və Cənubi Osetiyadakı Rusiya vətəndaşlarına qarşı istənilən güc tətbiqi cəhdinə adekvat və sərt cavab verəcək.
Rusiya hökumətində üçüncü şəxs hesab olunan Federasiya Şurasının sədri Sergey Mironov da tanınmamış Abxaziya və Cənubi Osetiyada yaşayan rusiya vətəndaşlarının həyatı üçün təhlükə yaranacağı təqdirdə, Rusiya tərəfindən güc tətbiqinin məqsədəuyğun olduğunu bildirib. O, Rusiya Xarici İşlər Nazirliynin bu məsələ ilə bağlı bəyanatının isə siqnal olduğunu deyib.
Artıq Gürcüstan tərəfi də təhdidə təhdidlə cavab verib. Rəsmi Tiflis Rusiyanın Gürcüstana qarşı hər hansı təcavüzkar hərəkətinin cavabsız qalmayacağını bəyan edib. Rusiyanın «İnterfaks» agentliyi Suxumidəki mənbəyə istinadən tanınmamış Abxaziya ilə sərhəddə, Kodor dərəsinin yuxarı hissəsində 7 minə yaxın gürcü hərbçisinin toplaşdığı haqda məlumat yayıb. Hərbi qüvvələrin 2,5 mininin ehtiyatda olan hərbçilər olduğu bildirilir. Aprelin 29-da Rusiyanın Xarici İşlər Nazirliyi də Kodor dərəsinin yuxarı hissəsində Gürcüstanın polis qüvvələri və hərbçilərinin sayının artırılması haqda məlumat yayıb. Bəyanatda onların sayının 1500-ə çatdığı və bununla Gürcüstanın hərbi əməliyyatlar üçün plasdarm hazırladığı bildirilir.
Rusiyanın Xarici İşlər Nazirliyinin aprelin 29-da yaydığı digər bəyanatında isə Rusiya gürcü-abxaz münaqişəsi zonasında sülhməramlıların sayını artıracağı haqda məlumat yayılıb. Gürcüstanın avrointeqrasiya məsələləri üzrə dövlət naziri Georgi Baramidze Rusiya Xarici İşlər Nazirliynin bu bəyanatını «həyasızlıq» adlandırıb. G.Baramidzeyə görə, sülhməramlı əməliyyatlardan danışmağa Rusiyanın nə siyasi, nə mənəvi, nə də hüquqi haqqı yoxdur.
NATO-nun Brüsseldə 26+1 formatında keçirilən sammitində də gürcü-abxaz münaqişəsi zonasında baş verənlər əsas müzakirə mövzularından biri olub. Rusiyanın NATO-dakı xüsusi nümayəndəsi Dmitri Raqozin Şimali Atlantika blokunın baş katibi Yap De Xop Skefferlə görüşündə Gürcüstan rəhbərliyinin bəyanatları ilə bağlı rəsmi Moskvanın mövqeyini çatdırıb. Rusiya rəsmisi çərşənbə günü məsələni NATO-Rusiya şurasının iclasında da müzakirə etməyə hazır olduğunu bəyan edib: «Gürcüstan özünü təxribatçı kimi aparır. Belə təəssürat yaranır ki, hansısa məsuliyyətsiz müharibə üçün bəhanə axtarır».
NATO-nun rəsmi nümayəndəsi Ceyms Appaturay isə Gürcüstan televiziyasını onun sözlərini təhrif etməkdə ittiham edib. Xatırladaq ki, Gürcüstan televiziyaları bazar ertəsi Appaturayın Rusiya sülhməramlılarının gürcü-abxaz münaqişəsi zonasından çıxarılmasına tərəfdar olması haqda məlumat yaymışdı. «Mən qeyd etmək istəyirəm ki, bu məlumat tamamilə yalandır. Mən buna bənzər bir şey deməmişəm və NATO şurasında da bu haqda fikir səslənməyib»,- deyə Appaturay bildirib.
Rəsmi Tiflis Rusiyanın bütün addımlarının qarşısını Rusiyanın Ümumdünya Ticarət Təşkilatına qəbulunu əngəlləməklə cavab vermək niyyətindədir. Rəsmi Tiflis bu məsələ ilə bağlı Rusiya ilə danışıqları dayandırmaq niyyətini açıqlayıb. Yeri gəlmişkən, qeyd edək ki, Gürcüstan prezidenti Mixail Saakaşvili tanınmamış Abxaziya və Cənubi Osetiya vətəndaşlarına müraciət edəcək. Müraciətdə prezidentin Rusiyanın ittihamlarına da cavab verəcəyi gözlənilir. |
| |
|
| |
|
|
|
| İrad tutulmamışdır. İlk iradçı olmaq üçün tıklayın!
|
|
|
|
|
|
| |
| |
|
|
|
Eyni kateqoriyadan digər xəbərlər
