| |
Bu gün Azərbaycan Dövlət Əmlakının İdarə Edilməsi üzrə Dövlət Komitəsi (DƏİEDK) ilə «Azercell Telecom» Birgə Müəssisəsinin təsisçisi olan Türkiyənin «Azertell Telekommunikasyon Yatırım Dış Ticaret A.Ş.» şirkəti arasında «Azercell»dəki dövlətə məxsus 35,7%-lik payın alqı-satqısına dair müqavilə imzalanıb.
Bu barədə DƏİEDK-in mətbuat xidmətindən məlumat verilib.
Məlumatda qeyd olunur ki, şirkətdə Azərbaycan hökumətinə məxsus olan pay müəssisəsinin digər təsisçisi olan Türkiyənin «Azertell Telekommunikasyon Yatırım Dış Ticaret A.Ş.» şirkətinə təklif edilib və şirkət həmin payın alınmasına razılığını bildirib.
Qeyd edək ki, «Azərbaycan Respublikası Rabitə Nazirliyinin bir sıra müəssisə və obyektlərinin özəlləşdirilməsi haqqında» Azərbaycan prezidentinin 2001-ci il 29 mart tarixli sərəncamına əsasən, Rabitə və İnformasiya Texnologiyaları Nazirliyinin (RİTN) tabeliyində olan bir sıra müəssisə və təşkilatlar, habelə onların iştirakı ilə yaradılmış müştərək müəssisələr özəlləşdirməyə açıq elan edilib. RİTN-in iştirakı ilə yaradılmış «Azercell Telecom» BM-nin nizamnamə kapitalındakı dövlət payının inventarizasiya olunaraq yenidən qiymətləndirilməsi ilə bağlı Komitədə aidiyyəti təşkilatların nümayəndələrindən ibarət komissiya yaradılıb. «Müştərək müəssisələrin nizamnamə kapitalında dövlətə məxsus olan payların yenidən qiymətləndirilməsi və həmin pay üzərində mülkiyyət hüququnun əldə edilməsinin rəsmiləşdirilməsi qaydaları haqqında Təlimat»a uyğun olaraq, komissiya tərəfindən «Azercell Telecom» BM-nin nizamnamə kapitalındakı dövlət payının inventarizasiyası həyata keçirilib. Eyni zamanda, dövlətə məxsus payın qiymətləndirilməsi, Komitəyə özəlləşdirmə prosedurlarının aparılması və müvafiq əqdlərin bağlanmasında məsləhətçi xidmətlərinin göstərilməsi məqsədilə «Ernst & Young» beynəlxalq məsləhətçi şirkəti cəlb edilib. Məsləhətçi şirkət tərəfindən «Azercell Telecom» BM-dəki dövlətə məxsus 35,7%-lik payın qiyməti 180 mln. ABŞ dolları müəyyənləşdirilib.
Xatırladaq ki, Azərbaycanın aparıcı mobil rabitə operatoru olan «Azercell Telecom» BM-nin təsisçiləri rolunda Azərbaycan Rabitə və İnformasiya Texnologiyaları Nazirliyi (35,7%) və Holladiyanın «Fintur Holdings B.V.» şirkəti (64,3%) çıxış edib. «Fintur Holdings BV» isə «TeliaSonera» (58%) ilə «Türkcell» (42%) şirkətlərin yaratdığı birgə müəssisədir. «Azercell»in abunəçilərinin sayı 3 mln-dan çoxdur, ümumilikdə isə respublika üzrə mobil rabitə abunəçilərinin sayı 4,3 mln. nəfərdir.
|
Geri
Eyni kateqoriyadan digər xəbərlər
