| |
2 Aprel beynəlxalq uşaq kitabı günüdür. 1953-cü ildən etibarən uşaq ədəbiyyatının inkişafındakı xidmətlərinə görə məşhur nağılçı Hans Xristian Andersnın doğum günü uşaq kitabı günü kimi qeyd olunur. Hər il bu günün qeyd edilməsində məqsəd cəmiyyətin diqqətini uşaq ədəbiyyatına və onun problemlərinə cəlb etməkdir. Amma nədənsə, uşaq ədəbiyyatı sahəsində problemlərin günbəgün artdığı bir vaxtda ölkəmizdə 2 aprel xüsusi gün kimi qeyd olunmur. Kitab mağazalarında əcnəbi uşaq ədəbiyyatı kifayət qədərdir. Milli ədəbiyyata dair nümunələr isə yox dərəcəsindədir. Bununla belə, uşaqların kitaba marağı azalmayıb. Amma onlar çox vaxt axtardıqlarını tapa bilmirlər. Psixoloqlar uşaqların kitaba marağını artırmaq üçün rəng və tərtibat seçiminə ciddi önəm verməyi tövsiyə edirlər. Mağazalarda rast gəldiyimiz əcnəbi nəşrlər nəinki azyaşlıların, hətta böyüklərin diqqətini çəkəcək qədər nəfis tərtibata malikdir. Satıcılarla söhbət zamanı məlum oldu ki, yüksək tərtibata malik olduğundan rus və ingilis ədəbiyyatlarına daha çox üstünlük verilir. Bu isə azyaşlılarda milli ədəbiyyat anlayışının sıfra enməsinə səbəb olur. Problem valideynləri daha çox narahat edir. Milli ədəbiyyat qıtlığı kitabxanalara da təsir edir. Bədii yaradıcılıq üçün kitabxanaya demək olar ki, müraciət edən yoxdur. Məsələdən Yazıçılar Birliyi də narahatdır, qurumdan bildirdilər ki, ötən illərə nisbətən uşaq yaradıcılığına müraciət edənlərin sayı artsa da, görüləcək işlər çoxdur. Uşaqlar üçün yazıb - yaradan qələm əhli isə gənc nəsli uşaq ədəbiyyatına marağı artırmağa çağırır. Almaniyalı pedoqoqlar deyir ki, nağıllara inamın öldüyü gün uşaqların inkişafı dayanacaq. Bu inamı yaşatmaq üçün isə uşaq ədəbiyyatının nəşrini gücləndirmək, səmərəli təcrübələrdən yararlanmaq gərəkdir.
|
Geri
Eyni kateqoriyadan digər xəbərlər
