| |
Bu gün Təhsil Nazirliyində (TN) “Yeni qiymətləndirmə sistemi: nailiyyətlər, problemlər və qarşıda duran vəzifələr” mövzusunda kollegiya iclası keçirilib.
Təhsil naziri Misir Mərdanov deyib ki, TN 2004-cü ildən Dünya Bankının dəstəyi ilə orta məktəblərdə yeni qiymətləndirmə sisteminin tətbiqinə başlayıb. Nazirin sözlərinə görə, gələn tədris ilinin əvvəlindən respublikadakı bütün orta məktəblərin birinci sinfilərində kurrikulum tətbiq ediləcək. Birinci siniflərdə yeni kurrikulum tətbiq edildikdən sonra dərs ilinin sonunda qiymətləndirmə aparılacaq və kurrikulum konsepsiyasının təkmilləşdirilməli istiqamətləri müəyyənləşdiriləcək. 2012-ci ildə isə orta məktəblərinin IV və IX sinfilərində milli qiymətləndirilmənin aparılması nəzərdə tutulur. Nazirin sözlərinə görə, 2006-2007-ci illərdə XI siniflərdə keçirdiyi mərkəzləşdirilmiş buraxılış imtahanlarında TN-nin liseyləri 95,63, Səbayel rayonunun orta məktəbləri 85,52 faiz nəticə göstəriblər. Ümumilikdə TN-nin liseyləri, Bakının Səbayel, Xətai rayonları, İmişli və Sumqayıt məktəblərində keçirilən mərkəzləşdirilmiş buraxılış imtahanlarında şagirdlər 91,56 faiz nəticə göstəriblər. Nazir bu imtahanlardan aşağı nəticə göstərən 1001 nəfər 11-ci sinif şagirdinin attestat almadığını da söyləyib. M. Mərdanovun sözlərinə görə, 2007-2008-ci il tədris ilində mərkəzləşdirilmiş buraxılış imtahanlarının Bakı, Gəncə, Sumqayıt, Əli Bayramlı, Mingəçevir, Abşeron, İmişli, Ucar məktəblərində və adıçəkilən rayon, şəhərlərin məcburi köçkün məktəblərində keçirilməsi nəzərdə tutulur.
Ötən ilin dekabrında XI siniflərdə keçirilən sınaq imtahanının nəticəsindən razı qalmadığını açıqlayan nazir qeyd edib ki, 52 min 96 şagirdi əhatə edən həmin imtahanda məktəblilərin yalnız 34,4 faizi müvəffəq qiyməti alıb. M. Mərdanovun qeyd etdiyinə görə, imtahan keçirildiyi 893 məktəbdən 100-ü “sıfır” nəticə əldə edib. Nazir aşağı nəticə göstərən məktəblərlə bağlı araşdırma aparacaqlarını və tədbirlər görüləcəyini də nəzərə çatdırıb.
|
Geri
Eyni kateqoriyadan digər xəbərlər
